話咁快就嚟到著短袖衫嘅季節喇，又未去到30幾度熱到溶，Come On！唔係唔出去戶外郁動下呀嘛！夏天就嚟到㗎喇，冬天嗰陣又掛住打邊爐以為來日方長，食到肥晒，而家仲唔做運動keep fit想等到幾時先？租架單車一邊踩踩踩一邊享受下涼風，真係幾爽㗎！

話說爸爸Ringo早幾日放連假嘅時候，就帶埋囡囡去柴灣租單車喇，本來囡囡就唔係好識踩，要用輔助轆先踩到嘅，點知一個感人嘅故事就咁誕生喇！

相入面打大赤肋嗰位咪就係單車舖老闆囉，佢問阿女想唔想學踩單車，知道阿女有心學，佢都有心教，於是就好細心好有耐性咁慢慢教阿女踩單車喇！呢啲唔凍唔熱嘅季節，仲要撞啱假期，單車舖實生意興隆啦，估唔到老闆都肯花時間免費教學呀下～

最後，喺老闆耐心教導之下，囡囡只係用咗半個鐘就學識點踩單車喇，聽其他網民講，呢位老闆都教識過唔少細路哥踩單車㗎啵，咁有人情味嘅舖頭，而家好少有喇，唔知老闆肯唔肯教大朋友呢，毛毛都想學呀！

封面圖片、資料來源連結： 柴灣人柴灣事