仲有唔夠一個星期就母親節喇，地方的媽媽需要……喂你諗咗去邊呀，講緊需要孝子孝女嘅關心呀。唔理你由十幾歲定廿幾歲開始慶祝情人節都好啦，送咗咁多次，都已經諗唔到送咩畀BB豬啦，更何況係由幼稚園就已經開始送嘅母親節禮物呢！係咪諗到頭都痕埋呢，唔怕喎，一於醒啲好嘢過你！

咪臭係KFC囉！唔好以為毛毛教你叫雞咁hea啦，係送炸雞上校嘅愛情小說畀媽咪呀！就嚟母親節，美國KFC就特別呈獻由上校做男主角嘅浪漫奇情小說，等一眾媽咪可以勾起那些年驚天動地愛戀過嘅甜蜜回憶喇。

個故仔是咁的：封面上邊孭住個c9手袋嗰位輕淑女好明顯就係女主角啦，話說佢不甘於毫無感情基礎嘅婚約，逃離自己嘅家族，追求自由戀愛，然後又愛上咗成面性感鬍鬚嘅白頭佬，情不自禁投入佢強而有力嘅臂彎，浸淫喺炸雞嘅油膩香氣之中……嗚呀，到底我睇咗啲乜呀，連白頭佬都可以做到愛情小說主角又係咩玩法呀！

如果媽咪表示有老花唔想睇書咁辛苦，KFC仲特別準備咗條片，由極具耶穌仙氣嘅小鮮肉讀畀你聽?！你睇下佢嗰可遇不可求嘅兩……隻眼，幾咁殺死，原來咩白頭佬小說都只係煙幕嚟，呢個哥哥仔先係隱藏版母親節獻禮，媽咪會唔會邊睇邊吮手指㗎……I mean 食完炸雞要吮手指呀。

封面圖片、資料來源連結：KFC