相信大家都見過一張經典網圖，就係個打工仔將啲文件飛晒上天，好似I don’t care咁之後，轉個頭就死死地氣烏低身執返晒啲紙，命運是對手，永遠低頭……其實點止打工仔呀，就算學生哥都想將啲功課呀測驗卷呀飛晒上天啦，不過份份卷都有自己個名，先至唔亂咁飛啫。

但係，噚晚喺Facebook page「名校 Secrets」就有網民貼咗幾張相出嚟，話喺粉嶺置福圍見到孫方中書院一個F.5同學嘅功課、通告、考試卷等等散落一地，有啲仲浸喺水度溶晒。

睇返地上紙張嘅數量，唔似係一個書包裝得晒，亦即係話「唔小心行行下喺書包跌出嚟」呢個可能性都幾低。唔少網民見到之後，都表示好擔心物主，懷疑佢受到欺凌，畀其他同學跌晒啲嘢落街……甚至有見義勇為嘅網民主動send email畀學校，希望校方介入事件。

另外，亦都有執到考試卷嘅同學根據卷上嘅年份，推測物主係今年已經F.6，考完DSE就高空擲物，將所有考試卷飛晒落街。

好彩，「名校 Secrets」啱啱有最新嘅post，物主現身說法，話自己十幾日前已經將堆文件掉咗去大埔區嘅一個垃圾站，都唔明白點解最後啲物件會出現喺粉嶺，話可能係垃圾車喺運輸途中跌咗啲物件出嚟。佢仲強調自己冇遭到欺凌或者亂拋垃圾?！之前大家都好擔心佢係咪畀人蝦，而家終於水落石出，一天都光晒就好喇！

封面圖片、資料來源連結：名校 Secrets（1）、名校 Secrets（2）