求婚呢家嘢，好彩就一生人一次，無論如何都想好好睇睇，浪漫驚喜之餘仲留返個美好回憶嘅。有人就鍾意約定成班FD子見證自己成功求婚嘅一刻，不過都有人覺得咁樣好似焗對方應承咁，所以想兩個人靜靜地sweet下嘅～嗱，得兩個人嘅求婚，又唔代表咩紀念都冇得留低㗎，請個攝影師離遠偷拍自己，咁咪可以第日睇返囉，仲唔使得自拍咁悶?！

最近美國有位叫Jacob Peters嘅攝影師就收到order，要上山喺日出時份遠距離紀錄個男朋友仔求婚嘅過程喇。要天光嘅時候影到，即係要半夜就出發啦，所以Jacob凌晨2:30就已經出門口，4:45終於去到山腳，不過仲要靠自己部電話微弱嘅電筒仔，孭住30磅攝影器材慢慢行上山（btw，明知要上山點解又唔帶電筒呢下……）。

朝早6點咁上下，終於都去到約定地點喇！等咗十幾分鐘，就見到有對情侶喺崖邊求婚喇！求婚過程同大家諗嘅都咁差唔多啦，個男仔拎咗隻戒指出嚟跪喺個女仔面前，個女仔就梗係感動到喊喊豬，兩個人又攬又錫咁囉。咁浪漫嘅畫面，Jacob梗係唔可以放過啦，佢離遠起勢咁影呀影，十幾分鐘入面影咗足足450張相，見對情侶開始坐低睇日出，佢就心滿意足咁收工喇。

當佢返到屋企之後，梗係第一時間send msg畀個客仔，同佢講聲恭喜啦，點知對方就覆返話「我好confuse呀，我哋完全冇見過你出現，同埋我哋仲遲咗去到?，你肯肯定真係影到我哋？」

哎呀，擺咗個大烏龍呀！原來Jacob影得咁辛苦，係影咗咁啱都喺山上求婚嘅另一對情侶！最後Jacob都喺萬能嘅Facebook搵到畀佢強行影咗嗰pair情侶，send返相畀佢哋，不過真係畀錢搵Jacob影相嗰pair就慘喇，就算退返錢都冇用啦，唔通求多次婚畀你補影咩……

封面圖片、資料來源連結：JP Photography