上星期台灣司法院釋憲，制定法例保障同性婚姻，令台灣成為亞洲第一個保障同志婚姻權利嘅地方，唔少人都認為係好事，大叫「愛是平等」。不過凡事都有人贊成有人反對嘅，反對同性婚姻嘅團體「下一代幸福聯盟」就開記者會，提出要全民公投，睇下大家同唔同意婚姻應該有性別限制喇。

記者會梗係唔少得口號同紙牌啦，其中一張影住兩個男仔攬住錫錫嘅相，就引起好大爭議喇。相上面寫住「各位親愛的家長們：您能接受同志教育進入校園嗎？」，似乎暗示相入面兩個小朋友受到同志教育影響而成為同志。

不過呢，原來圖中兩個小朋友根本唔係同志，而係兩兄弟嚟！小朋友未必識得好似大人咁將身邊人分親疏level，淨係會用最直接嘅方法去表達情感，幼稚園嗰陣女仔男仔拖住手唔通就係拍拖咩，更何況呢對係兩兄弟，攬住對方錫錫都好正常吖。

呢兩兄弟嘅媽咪喺Facebook出聲明，話自己從來都冇喺相度加任何字，亦都好不滿「下一代幸福聯盟」偷用張相，拉到政治議題上面。雖然毛毛擺明係撐同志，不過每個人對同一件事都有正反立場，呢樣係無可避免嘅。但係，夾硬話兩兄分錫錫就係同志，又差咁啲專業喎。

封面圖片、資料來源連結：中時電子報、Charlie Rao