點解我哋叫喵星人做主子，但係又會話自己係汪星人嘅主人？因為主子專做人類都估佢唔到嘅犀利嘢，但係狗狗就成日都做埋啲傻仔嘢，真係搞到我哋唔知笑定嬲好呀！

是咁的，有一日外國妹豬威廉絲突然收到男朋友個電話，叫佢出嚟睇啲嘢，但係又叫佢要冷靜啲喎，唔通男朋友有實派士畀佢，想向佢求婚？

妹豬一睇真係當場崩潰呀，點解佢隻狗狗Jade會棘住咗喺個車呔度㗎！狗狗個樣仲要好似同你講： 「我都唔想搞成咁㗎汪⋯⋯」

原來狗狗學人追貓，點知畀匿喺呔下面嘅高智慧主子跣咗一鑊，個頭入咗去出唔返嚟呀！

主人即刻打畀某某動物協會啦，點知協會又叫佢報警，警察又話幫唔到，最慘係搵埋消防員，消防員都話冇嘢可以用嚟幫佢剪開個呔喎⋯⋯

情況咁危急，主人唯有喊住搵Google大神求救啦⋯⋯好彩最後終於畀佢搵到間專接緊急個案嘅動物診所咋。

唔使驚，獸醫姐姐喺大廳～最後獸醫抱住有入就有出嘅信念，幫阿Jade放鬆個身，再用鐵撬撬下個呔，咁就幫阿Jade出咗嚟喇！獸醫仲話，佢哋都唔係第一次救狗狗出車呔㗎喇⋯⋯明嘅，狗天生就鍾意搵窿捐㗎嘛～

狗狗出返嚟重遇個呔都未驚過呀，仲要同佢合照，好似證明自己征服咗佢咁?！狗狗你就威啦，難為你主人嚇餐懵呀，不過最抵讚都主人個腦細，嗰日一聽到威廉絲隻狗出事，即刻叫佢唔使返工喇！係放佢一日假等佢諗辦法救返隻狗咋。呢啲咪好腦細囉⋯⋯55。

封面圖片及資料來源：the Dodo