2017年06月01日 星期四
著高踭鞋爬上人哋架靚車影相 畀車主鬧完都仲擺上IG？
唉！都話咗「面係人哋畀，架係自己丟」㗎啦！
話說，最近紐西蘭有位女女竟然著住高踭鞋爬上人哋一架價值大約350萬港幣嘅靚車度影相⋯⋯喂，呢架McLaren 675LT Spider全球限量發售，冚世界得500架㗎咋！我老婆有咩冬瓜豆腐你賠唔賠得起呀？你唔好搞9我老婆啦好嗎？
嗱，車cam都影到晒㗎！
而就喺呢位女女影相影得好happy嘅時候，車主Andy都咁啱目睹晒整個過程。Andy話，起初呢位女女只係企喺佢架車旁邊影咗幾張相，後來可能呢位女女以為冇人望到佢啦，佢竟然爬上架車度，仲要成個人挨咗落擋風玻璃喎，於是Andy咪嬲到衝出去叫佢「Get off the car」囉！跟住呢位女女就即刻落返嚟，兼且同fd子搭的士走人嘞⋯⋯
影得咁辛苦，唔係唔post呀？既使呢位女女畀車主鬧完，但佢都無懼世事變改，照post上ig！
再睇埋呢位女女其他ig相吖，原來佢已經唔係第一次咁做㗎喇，以前佢都曾經post過另一張坐上Ferrari嘅相！er⋯⋯唔知呢架Ferrari又係咪屬於第二個人㗎呢可？
Andy表示，其實平時出街都會遇到唔少朋友仔想影佢架車，佢唔介意人哋影，但佢就好介意人哋爬上去咁冇禮貌囉！佢仲話，希望類似嘅事件唔會發生喺其他車主身上，至於呢啲咁冇禮貌嘅人呢，就真係唔好以為自己做完呢啲行為會冇人知先得㗎！若要人不知，唔好太低b呀。
資料來源：dailymail
