有唔少人都話香港樂壇已死，但最近我哋終於見到新曙光喇，就算你幾耐冇聽本地歌手新歌都好，點都要留返少少數據聽本年度最有潛質女新人－林羨淇嘅作品呀！有「電音Siri歌后」之稱嘅淇淇，繼《男神為你唱首歌》之後，今日再喺Facebook公布第二首新歌《觀音兵》，聽完之後真係有股「香港樂壇百花齊放嘅日子返嚟喇」嘅感覺呀！

呢兩日天氣都麻麻地，心情都有少少肉酸，唔緊要，就等我哋一齊聽返幾首歌，一撳play，包你忍唔住笑。所以，記得唔好喺車度聽呀！

《男神為你唱首歌》林羨淇

MV嘅caption形容淇淇「歌藝尚算青澀」，實在太過份喇！一位少女可以唱到人肉Siri咁樣樣，你估咁容易呀！

《觀音兵》林羨淇

唔好以為毛毛幫淇淇賣廣告或者助攻乜乜呀，總之你聽啦，你聽完就明㗎喇。

《Sugar Baby》FFX

香港女子天團成名作，千祈千祈千祈唔好喺車度聽，因為車廂地板都算幾硬，掟爛個電話就唔係幾好啦。

《職安真漢子》黎耀祥 

集歌藝與演技於一身，香港有黎耀祥呢位方法演技派歌手，仲邊個敢話香港係文化沙漠？

《傻女》李逸朗

講到演技派歌手，又點少得善用聲波科技演釋經典廣東歌《傻女》嘅阿Don呢？聞者傷心，見者流淚，咪臭係呢種囉。

《媽媽今天不必擔心我》FAITH

FAITH三子年紀輕輕就能夠喺鏡頭前面重現娃娃舜當年風采，而自信方面更加係有過之而無不及，實在係長江後浪推前浪，睇怕香港樂壇嘅未來就靠晒佢哋喇。

《夏日熱辣辣》福頭老師

音樂無界限，兒童節目一樣可以係搖滾歌姬嘅搖籃。雖然，搖多幾搖個籃都好似就冧咁。

《香港料理》鄭少秋

壓軸出場嘅，就係不老歌王秋官喇！秋官呢個港產rap MV，將「認真做9嘢」嘅精神發揮到極致，相信電音Siri歌后淇淇「9做認真嘢」嘅一系列MV，都係想向秋官致敬啫。