2017年06月05日 星期一
【天才小球僮】狗狗陪主人打高爾夫球執波都可以做善事？
打高爾夫球呢家嘢唔係個個都啱玩㗎，拎住碌棍一嘢打個波出去，個波又咁細，打得近都仲好啲，打得遠，真係分分鐘唔知去咗邊㗎！呢個時候球僮就好重要，想搵返打失咗嘅波就靠晒佢哋喇～
美國有個叫Cooper嘅主人就有個最佳球僮陪佢打Golf喇。呢隻狗狗叫Davos，咪睇佢笑到烚熟狗頭傻下傻下咁，其實佢身懷絕技㗎！
原來Cooper雖然好鍾意打波，但係偏偏球藝就⋯⋯差少少咁囉。所以佢成日都會打到個波唔知去咗邊㗎。好彩Davos就最叻搵嘢，次次都使命必達，將主人個波帶返嚟㗎！
不過執執下主人就覺得唔對路喎，乜我有帶咁多個波出嚟咩？原來Davos唔止完成任務，仲要係超額嗰隻，連其他人打到唔知去咗邊嘅波都帶埋返嚟呀！咁咪好著數，賣返出去簡直係無本生利啦！
雖然係商機無限，但係主人都只係賣良心價2毫半美金一粒波，仲要將賣返嚟啲錢全部捐晒畀幫助動物嘅機構?啵～前前後後，Davos同主人已經賣咗400粒波，即係幫動物機構籌咗成100蚊美金呀！
唔知係咪因為有新聞報導，佢哋呢個慈善生意越做越旺，最近仲試過一日籌到30蚊美金?啵！
Posted by Al Cooper on 2017年5月24日
Davos做得咁辛苦，都係希望佢啲朋友仔唔使受苦啫。睇下佢望到電視其他貓貓狗狗嘅慘況睇到幾肉緊就知啦！你哋可能唔似Davos同佢主人咁，有方法籌錢捐畀動物機構，但係只要你哋記住領養代替購買，都已經幫到好多毛孩㗎喇！
