雨季又到喇，一唔記得閂窗，飛蟻軍團就會全面進場，你都咪話唔煩呀！不過世上點都有人慘過你嘅，香港最多都係有昆蟲入屋啫，外國住喺近郊嘅居民，面對嘅不速之客分分鐘係隻大黑熊呀！

最近，美國有個女人報警，話懷疑屋企有人入過嚟，於是就報警啦，點知佢哋睇返閉路電視之後先發現，原來疑犯係隻野生黑熊呀！今次真係熊出沒注意喇！

外國有野生動物擅闖民居，周不時都有新聞講㗎啦，有咩咁特別啫？奇就奇在今次呢隻熊啤啤，竟然冇搗亂，而係企咗喺度彈琴啵！雖然佢只係彈咗兩下，不過都已經聽得出佢好有音樂天份喇，如果上america's got talent， 評判一定會話「I don't like it……I LOVE IT！」咁囉！

「我從來都冇放棄過成為偉大音樂家嘅理想！不過彈兩下我啲手指仔已經好攰喇，都係睇下有咩食好過！」

呢隻貝多啤彈咗兩下之後唔知係冇咩靈感啦，所以就走去第二度搵嘢食醫肚喇。雖然黑熊彈琴睇落係好得意，不過都好彩屋主喺黑熊走咗之後先返到咋～熊人識得彈琴，如果呢個唔係迪迪尼電影劇情，隻黑熊就應該係人扮嘅……

封面圖片、資料來源連結：YouTube／Storyful News、Daily Mail

延伸閱讀：
【當堂嚇一跳】焗焗下Brownies突然有隻黑熊想闖入屋

【瘦到以為係人扮】企喺度思考世事嘅熊你見過未？