2017年06月08日 星期四
【捉到你喇】唔係見松鼠仔偷晒啲國旗 都唔知原來佢哋咁愛國㗎！
掛到成屋都洋紫荊旗或者五星旗又話覺得娘啫，美國國旗就唔同喇，好多人都當佢係一種fashion，擺咗紅白間加藍白星星元素喺身，又潮又vintage呀！美國有個老人家都插咗唔少國旗喺花園，不過就唔係做裝飾，而係因為佢係一位退役空軍老兵呀～
呢位老兵啱啱搬去新屋冇耐，就發現花園啲國旗仔成日無啦啦消失晒喇，搞到佢不知幾難過。唔通一搬嚟佢就得罪咗人自己唔知？定係有人唔鍾意佢咁愛國呀？
好彩，多得佢個好鄰居先可以真相大白咋！鄰居有日喺屋企望出去嘅時候，見到偷旗大賊原來係鋼牙同大鼻！呢兩隻松鼠仔夾手夾腳拆面國旗落嚟，跟住仲好熟手咁將面國旗摺摺摺，摺到細細咁方便神不知鬼不覺偷運返去，一睇就知係慣犯嚟呀！
「你去睇水啦！我摺好睇我打眼色就衝返基地！吱吱！」
（OK，其實毛毛唔知松鼠是咪吱吱叫……）
見到偷國旗嘅係兩隻松鼠仔，呢位老兵個心都定啲～原來鋼牙同大鼻偷咗成十面國旗，都係用嚟整個安樂窩啫～你哋咁愛國，相信個老兵都唔捨得罰你哋啦！
封面圖片、資料來源連結：Devvinnn1460／YouTube、Daily Mail
同場加映：《召集所有松鼠仔嘅得意面孔！》
