毛毛記得睇過一套戲，話個女仔好鍾意踢足球，所以就扮男仔冒認埋阿哥個身份，入男子足球隊度踢波喇。不過現實中又點會有啲咁嘅情節吖，就算個樣幾男仔都好，真的假不了，始終都係女仔嚟嘅～

但係呢個8歲嘅妹妹Mili就慘喇，人哋只係頭髮剪短啲啫，就成日畀人當係男仔。唉～人哋剪短頭髮先方便踢波㗎嘛。咪睇Mili人仔細細，因為佢踢波好有天份，所以8歲就已經跳級同成班11歲嘅球員出去打比賽㗎喇！

呢個足球小女將咁犀利，一定前途無可限量啦！本來係嘅⋯⋯話說佢哋球隊最近比賽打到入決賽嗰陣，居然畀人突然DQ咗呀！而DQ嘅原因，居然係話Mili係男仔，唔可以打女子足球賽喎！

有有搞錯呀？就算個樣點似男仔，Mili始終都係女仔嚟㗎喎，就算懷疑佢係男仔，都冇理由DQ晒成隊㗎？搞到好似Mili累晒全隊咁，你過唔過意得去呀？

Mili屋企人仲要拎埋保險卡出嚟做證據，上面寫到明佢性別係女仔，但係主辦單位話當時主席覺得Mili係男仔，何況嗰陣又係決賽，過咗就冇得追究㗎喇⋯⋯

梗係啦，話明主席開到聲喎，個個都係佢啲人，你點同佢鬥呀？

古乳有暈，龍門任你擺，到件事搞大咗，官方回應竟然話係因為登記嗰度打錯Mili性別喎。喂阿哥，咁人哋都即刻show咗保險卡同醫生紙證明佢係女仔啦，但係你睇都唔睇就DQ人喎！

好彩Mili妹妹都唔係孤單一個，有女子足球球星同教練都喺個人Twitter同Ig聲援同鼓勵佢，叫佢唔好放棄，仲邀請佢參加活動?。

Mili又點會咁易放棄吖，睇佢自己畫嘅呢幅畫就知啦，最重要嘅係佢知道今次球隊畀人DQ唔係佢嘅錯，就算望落似男仔又點喎，做自己覺得舒服就得啦！

封面圖片及資料來源：Buzzfeed、WOWT News、MiaHamm／twitter、abbywambach／Instagram、電影《少林足球》截圖