最近，網上流傳一段疑似喺髮型屋裡面拍攝嘅片段，話片中呢位哥哥仔喺度染緊時下最潮爆爆爆嘅刺蝟頭喎！嗱嗱嗱，咩挑染、咩漸層染髮呢啲大家就聽得多啦，唔知染到成隻刺蝟咁嘅髮型大家又見過未呢？事不宜遲，即刻同大家一齊見識一下先！

話明係刺蝟咁樣樣，咁就梗係淨係染髮尾啦！不過咁，女士們啲頭髮咁長就話可以淨係染髮尾啫，但男士們啲頭髮咁短，要淨係染髮尾都好有難度㗎喎⋯⋯冇錯，呢個時候你需要一個髮網。

首先將個髮網笠落個頭度，然後平均地挑返適量嘅頭髮出嚟，跟住就淨係染髮網以外嘅頭髮，最後等啲染髮劑上晒色之後再拎返個髮網出嚟⋯⋯登登登櫈，一個比刺蝟更刺蝟頭就大功告成喇！見呢個髮型咁靚，毛毛決定將佢命名為「真．刺蝟」⋯⋯指定動作，super！

吖話時話，呢個咁新潮嘅髮型除咗似刺蝟之外，仲好似有少少如來佛祖嘅味道咁啵～唔知呢位施主係咪看破紅塵，所以先走去整呢個頭呢？

資料來源：Eu mando o corte do Jacá