聽講政治人物開親記者會都好容易瀨嘢？梗係啦，而家搞親咩都話要直播，講錯嘢又直接出街喎！嗱，如果冇直播、冇錄影、冇錄音，咁咪講錯咩都唔使驚囉？喂係咪好橋先？

吖，唔知係咪侵侵都覺得呢個諗法好呢，自從佢上咗任之後，就多咗好多新聞發佈會話唔畀錄影，就連影相都唔得喎！唉，不過記者除咗講聲「你咁樣我好難做㗎喎」之外仲可以點吖？

你有張良計，就我有過牆梯。乜你以為咁就難到專業嘅傳媒喇咩？你唔畀我影，咁我咪畫囉！呢幅畫得咁神似嘅素描，就係CNN特登請法庭畫家喺現場幫佢哋畫㗎喇！

話晒喺法庭畫開喎，區區一個記招又點會難到佢吖？你睇下，用簡潔嘅筆劃同線條就將成個情況記錄低，仲可以清楚見到發言人啲動作表情?！連有邊個舉手問問題有畫低㗎！

啲圖上埋顏色之後，似足教科書插圖咁呀！老老竇竇，咁都畀佢哋諗到呢條橋，係有創意嘅！但毛毛硬係覺得呢條橋咁熟口面嘅？

吖，係喺《九品芝麻官》入面見過呀！肯肯定CNN有膠層係星爺Fans，所以諗到條咁絕嘅橋啫，55！

封面圖片及資料來源： CNN Media、CNN／Twitter