話說財務公司用500蚊搵人拍片上太空單嘢成為全城恥笑對象，梗係啦，500蚊喺今時今日連人情都唔夠畀啦。但公道講句，呢件事荒謬嘅背後，其實亦代表住好多人自貶身價，放棄樽鹽做爛市，結果咪助長咗老闆嘅氣燄囉：

主動性交際花

你WhatsApp group一定有人係無論邊個講嘢，講嘅嘢有幾廢佢可以秒回，結果你遲少少應人已經畀人鬧你潛水鬧你乜乜乜，呢一刻你只想學阿漿問一句：「嘩！使唔使呀？」

職場公公

公司總有啲奴性極重嘅公公，做足遠超人工三倍嘅工作量，仲瘋狂咁擦老細鞋，破壞晒市場上嘅供求關係，直接影響其他員工嘅價值，可謂損人不利己。

狗公三等兵

追女仔最怕遇到啲自願當兵嘅狗公隨傳隨到，又瘋狂用銀彈攻勢，但佢唔求啲乜，只求娘娘一張食熱狗嘅J圖做軍糧，就係你呢啲人養到班港女有公主病呀！

新Jing Cha故事

曾幾何時我的志願都係做個正義嘅警察，但而家嘅Jing Cha要埋沒良心亂拉人打9無辜市民先得到上司嘅讚賞，究竟我係做警察拉爛仔，定係做個攞正牌做爛仔？

賣港豬

香港有班離地港豬乜都講和平穩定、和諧理性，有乜不滿都肯袋住先，搞到其他有要求嘅市民被批評無理取鬧，係廢青、係暴民，你班Hi Hi俾我抖下得唔得呀？