頭先先讚完啲港鐵職員好盡忠職守（睇返：【盡忠職守】港鐵職員度過先放行），點知轉過頭佢哋另一個職員就冇溫熟書，對自己地頭都未熟晒，結果畀個地政署職員一嘢KO咗！

話說有個男仔喺觀塘站入面自彈自唱《高山低谷》啦，點知唱唱吓就畀個耳朵相當靈敏嘅職員聽到喎，身為盡責嘅員工梗係埋去趕人走啦。點知埋到去，個男仔仲繼續唱，咁港鐵職員就call機大叫疑似要求支持增援啩。

港鐵職員都好禮貌咁等個男仔唱晒成首歌先請佢離開啦，個男仔就話今日嚟係唔知根據咩喎......咁阿職員就好有禮貌得嚟又好有氣勢，指手劃腳、手口並用咁請教呢位男仔「你根據啲乜嘢呢先生？」

咁個男仔就答佢啦，原來個男仔係地政署測量師嚟嘅，佢事前做晒功課，check咗嗰度嘅地契，喺坑渠後面（佢坐緊嘅範圍）係公共地方嚟㗎！個男仔仲話「地契嘅嘢我可能會比你熟少少」、「你可以投訴我噪音、阻街，但唔可以投訴我佔領港鐵範圍」！

好型呀！結果呢，現場一早已經圍晒一大班食花生等聽歌嘅乘客喺度啦，咁咪call多個職員出嚟幫手維持秩序囉。

唉，都叫咗你哋要勤力啲，溫熟啲書㗎啦。

來源(睇片)：Dicky Hui