對於一個毒L嚟講，遊戲機就係生命！佢陪住自己度過每一個關卡，見證住自己unlock每一個成就，呢種感情其他人係唔會明㗎！最近呢段片喺網上瘋傳，毛毛睇完個心都赤赤痛，真係要唱返首「男人最痛～算這種～」……

是咁的，話說呢個日本男仔新買咗部PS4，諗住同FD子開心些牙齊齊打返鋪機啦：

點知愈打愈high，嘈到阿爸都頂唔順，結果走咗入房度用個鎚仔一嘢轟落部機度呀！個仔乜都做唔到，只能夠呆望住呢個進擊的熊本熊老竇，一下一下咁扑落去……就好似望住自己個女朋友死喺自己面前咁……我個心，好似穿咗個窿呀……嗚嗚！

其實呢件事仲有前傳㗎，一個月前阿仔仲係玩緊PS3嘅時候，都試過因為打機太嘈搞到老竇又要出動，成部機扔出街之餘臨尾仲要用個鎚仔扑多幾下。咁好臂力仲要隨身袋住個木鎚，唔通阿叔你係打開年糕嘅？

連續兩部機都畀老竇打爆晒，真係人間慘劇呀！諗諗下以前毛毛細細個打機嗰陣成日畀阿媽恐嚇話要鎖住部機，其實都唔係好慘㗎喇。呢位巴打，節哀順變啦，而家儲定錢買PS5都差唔多㗎喇（好似係）。

封面圖片及資料來源：R・T動画