今日毛毛睇到一個，隔住個mon都可以搞濕我，隻眼嘅故事，真係唔同大家開心些牙下都唔得呀！是咁的，一切都要由呢個post開始講起。話說早幾日有個西環街坊開post，話發現有隻貓仔被困喺西環菜欄第一檔嘅雪櫃同牆中間已經成個星期，跪求大家解決方法：

原post話愛協好快就收隊，不過都有人話愛協有義工留低～仲有呀，一班街坊同貓義工即刻秒速出嚟話願意幫手，仲話咁快就去到事發地點，睇下可以點樣幫到隻貓仔呀！佢哋一開始都有嘗試過用長棍同爬山繩諗住引隻貓出嚟，可惜都fail晒。

而一直都冇離開過嘅檔主眼見咁樣樣，竟然自己提議話爆開佢個雪櫃，救隻貓出嚟呀！嗚哇，真男人！之不過班貓義工因為擔心冇得百分百還原部雪櫃，所以最後決定，爆！牆！介紹返先，幅牆係屬於政府公物，所以要爆嘅話就要call消防嚟。而期間唔同嘅政府組織，好似警察、漁農處等等都有嚟到，以為佢哋會say no唔畀爆啦，點知佢哋都唔嫌麻煩，話為咗救貓，就要爆咗幅牆佢呀！

成班人為咗救貓一齊努力，攪盡腦汁，真係好熱血、好有愛呀！你睇下隻貓仔畀人救咗出嚟之後幾咁精靈！毛毛雖然唔識聽貓話，但我都知道隻貓仔好想同你哋講一聲多謝呀喵！

毛毛聽其中一個貓義工講，呢隻貓仔好好彩，畀人救起之後仲有人認咗頭要領養佢！真係太好喇！之不過喺香港仲有好多貓仔係等緊大家帶返屋企，有興趣可以睇下呢個由其中一個救貓義工所搞嘅貓貓領養活動，今個星期日就係喇！
都係嗰句啦，幫得幾多就幾多，呢啲先係香港人精神吖嘛！

封面圖片來源：Joey Manuela

資料來源： Cookie Mum/西環變幻時、Joey Manuela/西環變幻時

領養貓貓專頁：奴才認領區