有時收工想開電視輕鬆下，點知又得長命台同是是旦旦嘅大台，都唔知有咩好睇，不如投入祖國嘅懷抱，睇下強國劇啦！

係人都知強國劇集，特別係古裝劇呀，啲佈景同道具出晒名製作認真。最近有套武俠劇《五鼠鬧東京》就打破傳統，開創用環保道具嘅先河！

話明係武俠劇，打打殺殺，流血鏡頭就在所難免啦，通常都係用假血漿扮血嘅，唔通真係打到流血咩傻豬～而呢套神劇，就突破性咁放棄假血漿呀！吖呢一幕個鬍鬚佬拎住把劍起勢咁插插插個女人，個心口，係咁灑上嚟啲紅色嘢咩嚟嘅呢？

睇真啲，＿你個街，杞子嚟嘅喂？！又幾環保喎，話唔定呢套劇表面上係打嚟打去嘅武俠劇，實際上係養生食療劇，透過打鬥場面，強行教大家點食好啲喎？

之後陳曉（而我不知道陳曉是誰…OK，個男主角呀）都喺微博post相話自己七竅流血。嗯嗯，話明七竅，毛毛數嚟數去都係得三竅咋啵～說好的鼻同耳仔呢？唔好自抽都穿崩先得㗎嘛～

封面圖片來源：《五鼠鬧東京》截圖

資料來源：陳曉/微博