舊年11月，可能最接近神嘅男人，NBA籃球員高比拜仁，宣佈打埋呢個球季就要退役！搞到唔少球迷都堅・喊出嚟！幾唔捨得都好，告別戰呢日始終都會嚟，作為佢fan屎，梗係要十卜佢到最後一分一秒啦！

但係洛杉磯湖人作客猶他爵士場波係香港時間14號朝早十半打喎，高比打波，我哋就要打工，點睇呀？

嗱，一間公司值唔值得你為佢賣命，就係睇呢啲重要時刻喇！強國有幾間公司都出咗通告，話畀員工放假一日，可以留喺屋企睇直播呀！唉，公平咩？

呢間冇得watch at home，不過唔緊要，成班同事圍埋一齊watch at office都好嘅，廢事你班友back after watch呀嘛。

打工仔有得放假，但係有間學校就同學生講定，老師會親自點人數，高比退役前後一律唔准請假，怕班馬騮為咗睇直播而走堂呀！咁又係嘅，細路仔心智咁成熟，一個唔小心沉迷體育呢啲咁冇貢獻嘅活動點算呀（曲線要講明）？

高比拜仁，眼看你控球再上籃，你永遠係我哋心目中嘅男神兼籃神！

封面圖片、資料來源：slamonline.com、杭州網

延伸閱讀：【喊出嚟】籃神高比拜仁宣佈退休！、高比拜仁十大精彩入球回顧