係人都知整親有傷口要戒口㗎啦，不過生冷嘢唔食得牛唔食得蛋唔食得濃味又唔食得，人生仲有咩意義呀，不如一槍打死毛毛啦……所以如果媽咪唔知，毛毛有時都會偷偷地亂食嘢㗎，咩呀，真係好好食呀嘛……

最近有個馬鞍山街坊去食米線嘅時候，本身想叫冬菇米線，點知落單個哥哥隔住個護腕都知道佢整親，叫佢要戒口，唔好食冬菇呀！

跟住馬鞍山街坊就聽聽話話咁轉咗食豆卜啦，加杯奶茶就夠晒正。點知落單哥哥又再提佢，原來連奶茶都唔飲得㗎！個哥哥真係又細心又warm，唔係淨係求求其其快快手落完單就算，仲會關心個食客仔，好有以前細個落士多問你「今日飲咩汽水呀細佬」啲姨姨嗰種感覺呀，好親切呀！

唔係淨係飲食業先有暖男哥哥㗎，運輸業一樣有咁warm嘅代表！之前咪有個巴士哥哥幫上緊車嘅乘客擔遮，等佢哋唔會淋親囉！如果香港可以多啲咁抵讚嘅哥哥姐姐就好喇！

封面圖片、資料來源：Jilli Gut／馬鞍山之友

延伸閱讀：【抵讚！】細心巴士暖男幫乘客擔遮