古乳有暈，面就人哋畀，梳化就自己丟。有大量垃圾就梗係自己抌去大型垃圾站㗎啦，唔通求其抌埋一二邊咁冇公德心咩？唉，不過公德心真係唔係人人有，如果唔係，烏溪沙公眾碼頭旁邊嘅石灘又點會有咁大張梳化喺度喎！

話說，有網民今日就喺Facebook group「馬鞍山之友」度post咗兩張相，話見到「有人好冇公德心，掉張梳化落碼頭旁石灘」。不過話時話，要搬咗咁大張嘅梳化落去都要唔少力㗎喎，如果人哋係想貪方便亂抌垃圾嘅，使咩咁辛苦搬落去啫？

計毛毛話，張橙色梳化雖然舊舊地，但佢同背景啲色襯到絕一絕㗎喎……唔通張梳化係有人影完相之後漏低嘅？any肥，唔理張梳化係因為咩原因畀人放咗喺度都好，唔該放張梳化喺度嗰條友同毛毛執返走張梳化佢啦好嗎？

圖片及資料來源：Bryan TO／馬鞍山之友

回帶：【有冇搞錯】邊度嚟咁多殘體字垃圾飄嚟香港沙灘呀？

回帶又回帶：【有冇公德心㗎】大量白色液體流入屯門河！