2016年09月06日 星期二
想照住主子個樣紋身 點知變咗咁樣樣
聽講唔少情侶都會紋對方個名喺身上面，表示愛佢一生一世，其實真係有啲傻豬豬囉，一陣唔好彩分開咗點算呀…… 不過紋喵主子就唔同喇，因為奴才係會一世對主子效忠㗎！
台灣有個貓奴就打算照住主子個樣喺手上面紋身，以示對主子嘅忠心喇。佢兩位主子就係咁樣樣嘅，真係又精伶又打耳㗎～
話晒紋身都係一生一世嘅事，佢仲認真咁查埋通勝擇個好日先出發去搵紋身師傅?。準備功夫做得咁足，實事事順利啦！同紋身師傅傾完一論，就畫好咗個草稿喇，老老竇竇，貓奴都話覺得同主子個樣有啲出入，不過表示到效忠的心就ok喇喎。
忍住痛咁畀師傅拮拮拮，辛苦咗一輪，終於紋好喇！睇下成果先！咦…點解…主子個樣變到咁樣樣嘅？係搵小朋友用marker畫㗎咋嘛？
主子又大眼仔變咗豆豉眼已經好慘㗎喇，仲要大細眼…仲有，下面隻蝙蝠俠又係邊度請返嚟客串㗎？聽講個忍痛紋身嘅貓奴返到屋企之後，兩位主子完全唔知發生咩事，一啲共鳴都冇呀陰公。
雖然主子個樣變到卡通公仔咁，不過貓奴話，其實係因為由第一針開始佢已經痛到狂喊，淨係想越簡單越好，所以師傅先幫佢紋個咁簡約風嘅圖案咋。唔好咁灰啦貓奴，反正平時都為主子做咗咁多吃力不討好嘅事，唔差在做多件啦……
封面圖片、資料來源連結：chiou3df／PTT
＜紋身系列＞
