聽講而家日本好興「食玩」㗎，即係食得又玩得，啱晒畀小朋友扮煮飯仔嘅玩具。不過話明係小朋友玩，多數都好簡單，兩包粉撈埋再加啲水攪幾下就玩完嘅，如果大人想玩迷你煮飯仔，就要跟呢個日本超強網民學幾招喇！

食神韜韜都話過「冇個爐點打」，由此可見個爐有幾重要！呢個超強網民首先喺100円店買咗包迷你磚返嚟，再請李小龍出山幫佢砌砌砌，終於用180塊迷你磚砌咗個10cm闊嘅小火爐出嚟。辛苦晒喇李小龍！知你好攰，不過都唔好「曱甴」一聲打爆個小火爐喎！

話明係火爐，就梗係用柴火㗎啦，所以又要麻煩李小龍劈柴喇！曱甴！

佢好似已經痛到冇知覺喇陰公……唔怕，一陣食多塊pizza補數！

跟住用青椒粒粒、火腿粒粒同芝士粒粒整好pizza，就可以放入小火爐度烤喇。Between，個pizza咁迷你，毛毛懷疑啲材粒可能細到唔可以用「粒粒」，要用「粉末」嚟形容…….

燈燈燈凳！終於完成，迷你pizza新鮮出爐！面層嘅芝士仲要烤到溶溶地，真係睇見都流晒口水呀！

咦，好似仲有柴火剩咗喎，唔好嘥呀，不如將伊貝放入去用五味真火烤佢七七四十八個時辰，睇下會唔會煉成狐狸精囉？

ピザ、こんな感じでグツグツしてます pic.twitter.com/DDymD5wPDc

— おでこし(金谷)Berryzデスロード (@38beem) September 19, 2016

封面圖片、資料來源連結：38beem／twitter