2016年11月18日 星期五
【聞者心痛】被棄養狗狗餓到要食石頭充飢
雖然養狗嘅朋友好少會好似養貓嘅朋友咁，叫隻寵物做聖上、叫自己做奴才，不過都一樣咁錫自己隻狗狗嘅，除咗正常餵狗糧，仲會得閒就買唔同零食畀佢，當正係自己小朋友咁湊～不過冇主人的狗狗像根草，佢哋就冇咁幸福喇。
話說「毛孩守護者」喺元朗某村口發現流浪狗狗阿輕，當時佢瘦到好似張紙咁薄，肋骨、盤骨、腳骨嘅輪廓都清晰可見。
義工帶咗阿輕去診所照X光，發現腸胃入面竟然全部都係大大小小嘅石頭！由於阿輕已經嚴重塞腸，仲有好大機會引發腹膜炎，所以佢哋就幫阿輕開刀做手術。
經過好似一個世紀咁漫長嘅手術，醫生喺阿輕腸胃入面拎咗兩大盤石塊同雜草出嚟……而家阿輕已經成功過度初次大手術，不過將來嘅康復過程依然係漫漫長路，阿輕你要加油呀！
到底一隻流浪狗，要有幾咁肚餓、幾咁絕望，先會吞石頭充飢？石頭又硬又冇味道，一般狗狗絕對唔會食落肚，但佢竟然選擇吞石頭，令自己暫時忘記飢餓。每一粒石頭，每一次吞嚥，都有血有淚……
更加令人心痛嘅係，阿輕原本係有晶片嘅，但義工聯絡到佢主人之後，個主人嘅回應竟然係「遺棄」。「毛孩守護者」講得好啱：「死，有輕於鴻毛，但對我們來說，每個生命都重於泰山」，希望有養狗狗嘅各位，記得自己對狗狗嘅承諾，尊重生命，永不棄養。
封面圖片、資料來源連結：感謝「毛孩守護者」同意轉載
