話說台中大里區有間叫「貓多多飯館」嘅餐廳，餐廳如其名，冇嘢多，就係貓貓多。

聽講呢班主子sss平時仲好聽話，天氣凍嗰陣都肯乖乖地著衫，所以老闆娘間唔中都會準備唔同款式嘅靚衫畀佢哋著，幫佢哋保暖。吖～唔知呢班主子sss今次進行簡單而隆重嘅跨年儀式嘅時候又會著咩衫呢？

嗚哇，原來係車厘龜公仔衫呀～睇住八隻主子齊齊變身做車厘龜，呢個場面真係好壯觀！

而所謂嘅跨年儀式，其實就係咁樣樣行過呢條黃線，意思都係攞個好意頭，等新一年有個好開始咁嘅。

不過唔知係咪件車厘龜公仔衫個龜頭太重太大嘅關係呢，班主子sss著咗件公仔衫上身之後，視線就畀個車厘龜頭遮住，搞到老闆娘就算瘋狂用敲罐罐嘅聲音嚟引導佢哋，佢哋都用咗成兩分鐘先完成到呢個跨年儀式。

事不宜遲，馬上去片：

溫馨提示，識睇一定係聽埋老闆娘嘅旁白，尤其是係嗰句「不行再跨回去！」……真係令毛毛覺得老闆娘非常可愛！

資料來源：貓多多飯館

睇埋：【用精靈球啦！】呢條鯉魚王會唔會太得意？