Lego呢樣嘢，大家細細個就聽過呢個名喇～咪好似砌puzzle咁跟住個說明書喺咁砌，就可以將盒上面嗰嚿嘢整返個實物出嚟，就算冇藝術天分都唔怕砌唔到啦！不過總係有啲叛逆不羈嘅朋友仔係唔鍾意跟說明書，鍾意砌出我天地嘅，好似呢位朋友咁就真係估你唔到喇～

表面上呢盒只係一盒好普通嘅電單車lego同盒入面嘅零件，但係只要經過呢位仁兄砌一砌，唔止單車變摩托，電單車都變人力車呀！

你睇下話咁快就砌好一部真係載到嘢嘅人力手拉車喇！不過有車冇人又點拉得郁呢？

出嚟啦！你睇呢個Lego車伕嗰個Gel到花輪同學咁樣樣嘅頭，加上烔烔有神嘅雙眼，仲有鋼條般嘅強壯臂彎同堅硬嘅胸肌?！佢連表情都交足戲，個口擘到大一大，好似真係大喝一聲就抬起架車咁呀。

原來呢個神秘嘅手拉車伕係負責運送電單車零件㗎，你睇佢，幾畀心機搬啲嘢上去，插返好支旗仔就出發啦！估唔到踏入新一年，唔止人類放完假，就連Lego都要開工喇。呢位網友製作出呢副「超」現實主義Lego，再加埋最後呢幅圖，車伕瞓喺車上嘅時候流露嘅空洞眼神，真係充分表達出打工仔「呀～～我唔想做嘢呀！」嗰份收假心情呀⋯⋯

封面圖片及資料來源：mignonnes／twitter