返工返學要夠努力，做愛做的事要大大力，咁講嘢就梗係至緊要有牙力啦！汪星人無論食嘢、玩波波、定咬骨骨都係用棚牙，牙力一定唔嘢小，直頭可以話係第二對手咁呀！不過汪星人唔似得我哋日日刷牙，棚牙可能又黃又黑，笑起上嚟咪唔夠靚仔囉？

嘩，呢隻狗狗就笑得夠晒燦爛喇，見牙又見眼，好靚仔喎，係咪執到金呀？係人都知狗狗嘅牙有大有細仲有返咁上下尖㗎啦，因乜解究呢隻狗狗棚牙咁整齊，好似人咁嘅？唔通佢都去咗箍牙諗住箍完塊面會細啲？

「主人，你成日話我黑面，我今日笑得靚唔靚仔呀！」

執到就係執到，不過唔係金，係佢口入面棚牙呀！平時買埋咁多波波呀骨骨呀公仔呀你都唔咬下，好玩唔玩竟然玩假牙？好講喺邊度執返嚟喇啵，一陣搞到老友記咬唔開燒鵝髀呀！

佢主人話佢間屋嘅前業主係一對老夫婦，相信佢哋埋咗副假牙喺花園，咁啱畀狗狗掘掘下發現咗～

狗狗掘到假牙都唔係出奇呀，最勁係佢竟然好似識得點用咁戴喺個口度吖嘛，咁醒目，下次會唔會又喺唔知邊度執個假髮嚟戴㗎？

封面圖片、資料來源連結：Lucas Alves Magalhães、The Dodo