換面app真係歷久不衰，玩咗成年大家都仲發揮緊無窮無窮小宇宙，製造出各種換面災難，真係好意外，好開心呀！但係換面都有啲成功例子嘅，而一個成功例子一出，就會有一堆人跟風一齊影㗎喇～

好似呢幅胡迪換面相，喺Twitter一出就瘋魔日本網民，搞到個個去東京迪士尼都要去搵胡迪換一換面打個卡先捨得走呀！梗係啦～唔止自己個樣可以變胡迪咁，仲可以將自己本來嘅面目變成機動遊戲入口，等啲妹豬自己送羊入虎口喎～有個日本妹豬就諗住跟住影嚟呃下like，點知搞到冇面見人囉！

胡迪都仲係胡迪，但係妹豬塊面呢？塊面去咗邊呀？咪成堆字鑿咗喺塊面度囉～係Fast Pass Entrance呀！妹豬居然同個牌換咗面呀！不要怕，技術性調整啫，一定係太多人，又或者對唔啱位啫，等啲人走咁啲，行去另一邊再影過啦～

點解會咁㗎！嗚⋯⋯今次係同另外一邊個Fast Pass門牌交換咗呀⋯⋯唔通連個app都唔鍾意我？定係有咩暗示呀？次次妹豬塊面都係變Fast Pass Entrance，咩意思先，妹豬塊面係隨便畀人出入㗎咩！

有網友話，妹豬塊面只係畀個app封印咗喺魔鏡啫～咦，望落又真係幾似喎，原來魔鏡係咁嚟嘅，唔怪得之魔鏡死都話白雪係最靚啦，原來係硬入式廣告！

封面圖片及資料來源：tmototya／twitter、sayapo16​／twitter