得閒除咗打機，其實仲有好多有益身心嘅嘢可以做嘅，例如砌下砌圖咁吖，可以訓練下耐性同埋眼力，當你逐塊逐塊砌好嗰陣，成幅圖咁靚仲好有成功感?！但係有好多砌puzzle嘅達人，已經唔滿足於普通嘅公仔同風景puzzle，要砌就要挑戰地獄級嘅puzzle！

原來除咗塊塊一樣色嘅純白純黑地獄，呢個系列仲有出埋大豆地獄同白米地獄呀！就咁睇都覺得眼花啦，仲話要跟住幅圖嚟砌，救命呀！自己砌就咪搞喇，不過用嚟送禮就一流啵～

有一位台灣網友最近就收到朋友精心挑選嘅愛的禮物喇，不過唔係白米，亦都唔係大豆，就咁睇一塊塊啡啡哋又有啲黑點，唔通係曲奇地獄？睇真啲，眼嚟㗎喎，係一對一對非常之鹹濕嘅眼睛呀！係咪覺得似曾相識呢？

咪就係呢隻老是常出現嘅Doge柴犬囉～因為佢之前紅到去到邊都見到佢，所以台灣網友們都叫佢就神煩狗呀！一隻都咁煩⋯⋯

砌完有咁多隻咪煩中之煩？嚇死有密集恐懼嘅寶寶喇！佢哋仲要每一隻都咁望住你，好似嘲笑緊你永遠唔會砌得完呢幅砌圖咁呀！砌完如果掛喺屋企，就好似成日都有好多對眼望住你咁，啱晒覺得空虛寂寞覺得凍嘅單身狗呀～

可憐嘅網友對咗呢副252塊嘅Doge地獄三個禮拜，都仲未砌得晒呀，聽講仲話有超級無敵打大佬1000塊版?。等你啲人咁鍾意Post Doge吖嗱，下次如果你識邊個朋友成日send呢隻狗畀你就買副畀佢，一於等佢對Doge對飽佢！btw，唔知幾時會出揈頭鴿地獄呢？

封面圖片及資料來源：Beverly官方網頁、Ding Ding、wowsodogewow​／twitter