買玩具畀寵物真係同買禮物畀女朋友一樣咁難捉摸呀！又要估佢哋鍾意啲咩，一陣買錯又怕佢哋唔領情。好似啲喵星主子咁，買咗件玩具畀佢哋，但係佢竟然情願要個紙箱都唔要件玩具呀！

如果你咁不幸好似呢個唔識死嘅奴才咁，買錯咗超迷你嘅貓抓塔，就算你有9條命都唔夠死呀！不過呢個外國嘅主人就好彩喇，雖然訂錯咗嘢，但屋企嘅汪星人一樣咁捧場喎！

咦，主人做咩買個枕頭畀汪汪呀，係咪怕佢瞓捩頸呢～

原來呢個唔係枕頭，係一張床呀！是咁的，主人唔想狗狗瞓地板咁凍冰冰，咪上網訂張狗床囉。點知送到嚟先知買錯咗超細碼，真係有冇狗錯呀！

但係狗狗唔止冇怪主人，仲鍾意張床仔鍾意到不得了，成日喺主人面前又瞓又坐喺張床仔度，真係冧死人喇～

有寵物用品公司睇完個Post，見狗狗咁乖，所以即刻送咗張大床畀佢呀！不過就算有大床，狗狗一樣咁鍾意主人買嘅床仔嘅。

話口未完，又有公司送床仲有窩夫咕?畀狗狗喇～喺個Post下面仲有好多公司嘅comment爭住送嘢?呀！雖然今次主人擺咗個大烏龍，但係變相益咗狗狗多咗兩張大床同玩具，真係同塞翁有得揮呀～

見到狗狗咁乖咁抵鍚，做貓奴嘅真係有啲唏噓⋯⋯冇呀，主子，奴才冇諗過轉會呀！係係係，奴才而家就去開罐罐⋯⋯

so my mom accidentally ordered an xs dog bed but he's still grateful.. pic.twitter.com/Lm5rfdIWeL

— pae❁ (@paetonmathes) 2017年4月11日

封面圖片及資料來源：paetonmathes／twitter、cewallace9／reddit
回帶：【玩嘢呀】奴才你買個咁細嘅貓抓塔畀朕係咩意思？