當一個人遇上危急嘅情況，就會激發出佢嘅潛能，諗到啲平日估唔到嘅方法去解救自己㗎！

好似呢個朋友咁，見到隻小強即刻用封印術封印住佢！仲要用隻透明碗，咁就肯肯定見到佢仲識唔識郁，唔會發生一打開隻碟就發現佢唔見咗嘅慘劇喇。

不過估唔到台灣有位網友仲強勁，用膠紙就捉咗隻烏繩喇！點都估唔到，呢隻唔係普通嘅烏蠅，係烏蠅老母呀！畀人咁嚇返，人都咇嘢啦，更何況係烏蠅？

但係睇真啲，佢咇嗰啲唔係便便喎。嘩，識郁㗎喂！原來佢咇嗰啲係仔呀！人嚟呀，犯婦人生仔呀！有網友就解釋原來烏蠅喺危急關頭，會將啲仔咇晒出嚟，望自己走唔甩，啲仔都可以逃過一刧，呢種犧牲自己嚟救啲仔女嘅情操，真係好偉大呀⋯⋯嗚⋯⋯係母愛呀哈利！可惜啲仔都係走唔甩⋯⋯

難怪另一個網友用密實袋都有呢個情況啦！毛毛好似隱隱約約聽到烏蠅阿媽喺度叫：「走啦！你哋走啦，阿媽唔得㗎喇，你哋以後要生性做蟲，唔好做隻盲頭烏蠅呀！」嗚⋯⋯真係好感人呀！

正當大家都好關心啲蟲仔最後結局點⋯⋯網友話，最後啲蛆蟲仔爬返入母體，但係佢哋唔係同阿媽一齊，係食咗阿媽嚟維生吖⋯⋯果然大自然真係好現實。

封面圖片及資料來源：t29593339／PTT、邱小憲、Tang Kelora

回帶：【最新封印大法】呢個咪小強魔鏡號？​