通常見到明星，我哋都會9衝去同佢哋影相嘅～梗係啦，咁難得，下次都唔知仲有冇機會喇⋯⋯就算有下一次，個明星都未必記得你係乜水啦！但係美國有位仁兄，唔止有機會年年都同一個喜劇明星影相，仲影到連個明星都認得佢呀！

左手邊呢位哥仔叫Ted哥，右邊嗰位就係拍《賤鄰50》同《刺殺金正恩》嘅Seth Rogen喇！是咁的，Seth Rogen搞咗個慈喜團體，專係支持腦退化症嘅患者嘅。而Ted哥啱啱入大學就做活動搞手，同佢嘅兄弟會幫呢個團體籌款，仲籌到贏埋比賽，咪可以見呢位明星一面囉～

估唔到事隔一年，Ted哥又有機會參加呢個團體嘅活動喎，於是佢就事先印定上年幅相出嚟，問Seth 可唔可以同佢影返幅一模一樣嘅相嘞。就係咁，一幅相中相就完成咗喇！

好事嘅嘢，一不離二，二不離三，影完一幅相中相之後，Ted哥就好似創造咗個傳統咁，一年要搵Seth影一次呢幅相，影到連Seth Rogen都認得佢喇！第三年就變埋做相中相中相喇！咁似麥太個紙包雞包紙包雞嘅？

Any肥，不經不覺今年就係第四年喇，Ted哥到今時今日都唔肯同大家講佢姓咩，話要保持返少少私隱喎～佢就好似係一個傳奇咁，存在喺呢個網絡嘅世界入面⋯⋯一眾毒L如果想年年同女神影相，不妨試下呢招吖～不過首先⋯⋯你要有機會影第一同第二張先囉⋯⋯

封面圖片及資料來源：funkythursday／Instagram、entertainmane.ie