最近，澳洲有位媽媽Zephy Mahlis就送咗個「大個仔急救箱」畀13歲嘅囝囝阿James做生日禮物，佢叫囝囝喺緊急嘅時候就打開個急救箱喎⋯⋯Come on， James！到底個急救箱入面裝住啲咩呢？一齊睇下！

呢位媽媽話，個急救箱入面裝住嘅全部都係囝囝未來幾年會用得著嘅嘢，例如有沐浴露啦、剃鬚刀啦、止汗劑同⋯⋯同安全套？嘩嘩嘩，呢位媽媽竟然送安全套畀13歲嘅囝囝？阿仔佢好似未夠秤用啵⋯⋯

事後呢位媽媽就解釋，佢話其實送安全套畀囝囝都係想鼓勵囝囝唔好怕尷尬，多啲同佢傾心事啫。佢仲話自己同囝囝嘅關係不嬲都好close，成家人都成日開玩笑喎。

至於囝囝收到份禮物又覺得點呢？佢就話好鍾意，仲話世上只有媽媽好，話阿媽諗到送安全套畀佢真係超低能勁搞笑咁話喎！

另外，除咗呢個「大個仔急救箱」，呢位媽媽仲整咗張卡，上面list咗13件希望囝囝銘記於心嘅事，包括要識得揀朋友、要做個gentleman、要同屋企人保持聯絡、要多啲聽老竇意見等等。

資料來源：Zephy Mahlis、The Sun、Daily Mail