天口咁㷫，唔好話人吖，塊地都曬到熱辣辣呀！難為一班地盤大佬仲要日日同陽光玩遊戲，又搬又抬一身汗咁，如果地盤度有個泳池，Lun廚時間可以一嘢跳入去，浸下水降下溫你話幾好呢～

有啲嘢係睇你有冇創意㗎啫～只要有創意，人人期望都可達到啦！唔信你睇？

嘩～好大個私人泳池呀！乜而家啲地盤真係有泳池咁好福利㗎咩？

睇真啲先啦，其實呢個係泥頭車個車斗呀！喂阿哥，你哋咁玩法，唔怕工頭捉你哋去照肺呀？其實呢班地盤阿哥都係想珍惜地球資源，諗住用得唔好嘥啫～

是咁的，因為最近天氣太熱，地盤阿哥怕啲新鋪嘅水泥會乾得太快裂開，所以咪要斟啲水入泥頭車個車斗，然後倒落啲水泥度囉～但係就咁一嘢倒晒好嘥啫～横掂天氣咁熱，一班阿哥咪趁放Lun廚順便落水降下溫囉～

你又浸～我又浸～剝晒衫褲剝晒鞋～係咪睇到都覺得好爽呢！仲要有埋隻沖涼鴨仔，真識玩呀！

不過咁浸法，一陣啲水倒落去，啲水泥咪溝埋阿哥嘅老泥？唔緊要啦，大家都是泥，不用分得那麼細啦～反正塊地都係畀你踩上去㗎啫，又唔係叫你咀落去。人哋平日做嘢咁辛苦，咪當係體諒下人哋囉～

封面圖片及資料來源：SWNS