打完暴風仲叫人返工，唔通連老細都唔鍾意我？唔好亂諗喇……因為你老細可能真係唔鍾意你！

即使你風雨不改，那怕要攀樹涉水都撲返公司，今時今日，咁嘅打工態度都係唔夠㗎（喺老細眼中）。點先夠？最好咪係用你嘅生命影響佢嘅生命，幫佢賺得一蚊得一蚊；部腦日出而作，日入都唔熄咁OT囉！就算唔講老細，淨係嗰班講嘢唔做嘢、做嘢喺度Hea嘅同事都有排你煩啦……

喺咁嘅職場時勢想搵兩餐，真係每一蚊皆辛苦。連默默耕耘18年勤力過農夫嘅陸永同C君，見到大家有血有汗咁搵真銀，都忍唔住企出嚟！至少，喺你耕到攰嘅時候，都可以同你耕……爸爹呀嘛。

畀次機會呀，老細！

老細有好多種，但就唔係個個老細都識體諒打工仔，例如……「打風叫你返工嗰啲！講到命喎，邊種老細值得你幫佢賣命呀？」陸永補充：「佢叫我返工係OK嘅。但如果我返唔到，佢要接受。又唔使好到話唔使我返，太好就冇魅力㗎喇。不過有種老細我一定唔會幫佢打工，就係唔出糧嗰啲！」

咁遇唔上好老細，早幾日要花幾粒鐘撲返公司嘅人，都唔使太Sad嘅。學C君話齋：「當全世界都話『黐線咩？打完風個城市咁樣，第二日仲要返工？』，我體會到嘅係，香港人喺咁困難嘅環境下都可以好禮讓！而且我哋要為自己自豪：『我咁都返到工喎！咪好勁？』我覺得香港打工仔都係好勁嘅人。」

同事三分恨

好人嘅阿頭，可遇不可求。最慘連同事都唔掂嘛！呢樣農夫深有體會：「我哋公司有個同事，人品『好』，做嘢『有交帶』，樣樣都好，除咗出世。佢最錯係出咗世呀！試過做騷有魔術師表演變橙，問觀眾『係咪聞到好多維他命C味呢？』，我同事竟然大嗌『我想知維他命C咩味呀』，寸到個魔術師喊。人品『好好』㗎。」

最弊同事阻人搵銀事少（因為實會），講你是非事大呢！咁嘅情況，陸永教大家專心返工作就得：「是非嘛。冇永遠是永遠非嘅。是得多你唔好太開心，梗有日非你；係咁非你，都有日是返你。是是非非，你可以點？」C君就勸大家面對麻煩同事，最緊要冷靜：「唔通同佢死過咩？為咗佢而坐監，邊值得呀？」

至於隔籬嗰位對足18年嘅「同事」，農夫兩個人都有啲意見。陸永話：「最悶就係冇新鮮感，但可以點啫？你哋成日有新同事，我哋冇得加多個㗎嘛？」C君插口：「仲肯做同事喎，咁都唔夠體裇佢呀？頂唔順可以點。（辭職唔撈？）咩唔得呀，我即刻同你組隊組合，改名馬……夫。」

工字不出氣

搵真銀真係蚊蚊皆辛苦㗎，因為同事老細煩，都未必夠啲Job煩。「自己鍾意做嘅工作之外，總會有啲工作想避免做，例如叫我哋Rap住嚟介紹嘉賓！唔係將資訊Rap出嚟就有趣㗎……『又有側田仲有巫啟賢』咁樣介紹，最弊個場合冇巫啟賢嘛，點押韻？（做完好多錢收呢？）睇下幾錢先囉！即係如果冇錢又要做呢個，最憎！當年工作量少，人哋覺得我哋淨係識Rap，都做過唔少；好在而家大家信任，畀機會我哋用唔同做法去做咋。」

但似足農夫日做夜做，都仲畀人話唔勤力，可以點？「農夫以前都成日畀上司老細話『勤力啲』㗎。因為主流唱片公司歌手可能有十幾人幫佢作曲填詞畀佢唱，一年做三隻碟；但我哋隻歌由無到有要諗好耐，可能一年先一隻碟。唔係唔勤力，係真係諗唔到嘛！同埋點為之勤力？個標準都唔知。去健身上堂操歌排舞，我哋全部冇。創作人嘅勤力係點呢？不停創作呀？我哋睇書睇漫畫吸收嘢又算唔算勤力呢？」毛毛唔敢問呢啲問題呀，咪陣間老細話我拎佢嚟出氣就唔好啦！

種瓜得瓜，種豆冇得唞

你話自己肯博肯捱都冇成果？農夫明，真係明。「努力唔一定有回報。我哋Indie時期玩音樂，同期好多有才華嘅叻人，但點努力都加入唔到呢個行業。我哋的確係好多運氣喺中間。就好似農夫耕田，大家都咁落力花時間去耕，一打風，呢邊吹走晒，嗰邊又冇事。」公平咩？「好多人做緊一模一樣嘅事，成功嘅你睇到當然係勵志，但畀人睇唔到嘅係多到數唔到！」

之但係即使冇運，天都無絕人之路嘅。「今次打風浸濕晒點算？轉行種第二樣嘢囉！種啲水種嘅，下次落雨都唔緊要。轉頭嚟旱災？又做第二樣嘢囉，或者轉行幫人整水閘。呢樣我哋體會得最多。做做下音樂，又有機會畀我哋拍電影拍劇，跟住又試下做主持；轉到最後，會發現所有嘢都殊途同歸，每樣嘢都幫到你做另一樣嘢。」咁未轉到工之前，冇咩事我都係返出去做嘢先喇……