是咁的，今年係抗戰勝利70周年，成立咗66年嘅強國決定將今年嘅9月3號定做假期，熱烈地彈琴熱烈地慶賀！香港正苦一向跟黨咁貼，有假就梗係放啦，只不過訂唔訂得成毛孩就唔知喇，不過我就知正苦有前科，試過突然加假，又試過突然減假，就好似以下呢啲例子咁：

無啦啦送多日假

1981年7月29日  查理斯王子做老襯

當時香港仲係英國手下嘅一粒棋子，大佬有喜休息一天，做細嘅都有得跟住抖一日。不過到咗今時今日，就算「阿爺」個囡嫁人都唔關我哋啲升斗市民事啦可？

1986年10月22日  英女皇訪港

嗰日係事頭婆第二次嚟香港嘅大日子，所以就有日假放！但而家如果個所謂「阿爺」要落嚟嘅話，我寧願繼續返工。

1999年12月31日  千年蟲入侵

呢條蟲嘅破壞力好似仲勁過成蟲，勁到政府要特登整日假畀特定嘅機構去斬腳趾避千年蟲，只不過嗰啲特定機構嘅員工就冇咁好彩囉！

無啦啦減咗日假

英女皇壽辰

就係呢個假期，令到好多97前嘅學生多咗兩日假，咁你知點解香港人咁鍾意英女皇啦？

重光紀念日

本來係紀念二次大戰結束兼夾英國重新接管香港嘅，原意同嚟緊9月3號嗰個差唔多，不過而家時勢唔同，咪用抗戰勝利日代替返囉！

P.S.以上兩個假期係畀其他節日取代咗，大家冇放少到假嘅，可以冷靜啲。

P.P.S.以上假期都係公眾假期，淨係有得放勞工假嘅你……可以唔冷靜返，辭職啦！