節目重溫
星期三港案

良心發現,認真製作,

緊貼時事,淺入深出。

毛記電視新聞部出品,每集5至10分鐘不等,

毛記主播聲音導航,超微型新聞紀錄片。

旁述: 盤菜瑩子

香港「反送中」運動,喺剛剛過去嘅星期一,正式抗爭滿100日。短短100日,警方已經喺全港多個地區,合共施放超過2千粒催淚彈,搞到全城煙霧彌漫、毒氣熏天!

有見及此,拍拖兩年嘅恆仔同阿遙,毅然決定加入民間自發組成嘅滅煙小隊,以土炮工具,同獨特滅煙技巧,一次又一次衝入毒煙之中,為大家撲熄一個又一個催淚彈,實行拍住拖去滅煙!
唔好睇呢個叫紫瑤嘅女仔而家成個「大笑姑婆」咁,其實3年前嘅佢曾經患過血癌,因為等待骨髓移植時嘅化療,搞到連笑都覺得攰覺得辛苦。

好在最後得到有心而又吻合骨髓嘅捐贈者無私奉獻,成功救返紫瑤一命,令呢個咁鍾意笑嘅女仔,可以無牽無掛咁展現佢最天真又燦爛嘅一面呀!

大愛鳴謝: 香港骨髓捐贈者資料庫 Hong Kong Bone Marrow Donor Registry
旁述:盤菜瑩子

當大家仍然追究「7.21元朗恐襲」責任,8.31當晚太子站亦上演另一場無差別恐襲。防暴及速龍小隊衝入地鐵站圍捕,期間更走入車廂內揮棍追打市民,甚至近距離施放胡椒噴霧,有乘客被打至頭破血流。

急救員阿謙當時正身處於列車上,除咗為乘客急救之餘亦目擊整個過程。阿謙認為事件比「7.21」更嚴重,自己絕對有責任為事件還原真相,同時亦要企出嚟,向一切暴力同白色恐怖說不!
旁述:崔健芒

一場「反送中」運動,揭發咗當權者嘅醜惡同無恥,但喺憤怒之中,我哋亦見證到同路人之間嘅團結同扶持,就連一向畀人感覺只顧吃喝玩樂嘅「港女」,都願意走上街頭發聲,令好多「巴打」都刮目相看!

自認係「典型港女」嘅Lara話,今時今日無論係港男定港女、勇武定和理非,都唔可以獨善其身,一定要團結一致,合力對抗呢個無恥嘅政權!
上星期日上環嘅遊行集會,警察再一次以武力清場,甚至喺無預警下連開36發橡膠子彈驅散示威者;同一時間,元朗亦上演一場白衣人入車廂追打無辜市民嘅無差別恐襲。

但警察遲遲未有到場救援,事後更以好混亂冇留意時間作為解釋理由,完全漠視市民安全,作為同樣係紀律部隊嘅消防員同救護員都睇唔過眼,警察唔係應該要維持治安、保護市民嘅咩!?
「預防禽流感,勿摸活家禽」
「大媽扭幾扭,紅包日日有」
「位位打賞百二蚊,阿叔阿伯樂繽紛」

呢啲咁有創意又咁抵死嘅標語口號,係出自兩星期前針對大媽霸佔公園賣藝嘅「光復屯門公園」活動。發起人阿泰同Steven 認為,光復活動嘅形成,全因政府對民生議題不聞不足。既然冇人理,一班「屯門牛」唯有集結力量,用最大嘅民意,對抗大媽擴音器!
毛記電視網站 · 版權所有 · 不得轉載 Copyright © TVMOST.COM.HK All rights reserved