一個8歲嘅細路女，竟然4年嚟每晚都喺佢臨瞓嗰刻，用手指去床邊嘅牆挖洞……因為22年前，佢爸爸，就係用呢個動作去侵犯佢。依家30歲嘅阿V，人生一直就好似活喺個洞入面，不見天日，因為根本就無人明白佢所承受過嘅痛，只有叫天不應、無聲咁去吶喊。試問我地，又點可以啞忍，畀呢啲肆意侵犯無辜者嘅衰人，就咁逍遙法外呢！
不要獨自面對性侵
風雨蘭求助熱線23755322

50年，82歲嘅英伯伯用左50年時間，苦心經營佢喺土瓜灣嘅「安樂水電工程」，一心只係想同老婆安安樂樂咁喺度過埋下半世。點知最近，屋宇署一個突如其來嘅決定，就話要咩都唔知嘅英伯伯，一下子拆左間舖，拎走哂佢呢50年嚟所建立嘅一切，令英伯伯嘅日子唔再安樂……

原本讀書唔成, 賣過老翻, 仲年少無知入過黑社會嘅Raco，係一個典型嘅衰仔。呢個曾經壞到唔識得愛惜自己、令到身邊每個人都好失望嘅衰仔，20年後嘅今日發現，原來一直以嚟，身邊都有人默默咁去愛自己。依家變乖仔嘅Raco好想同嗰一個特別嘅人講聲⋯⋯

咩話？行路環香港？仲要行足兩個禮拜？邊有路畀你行呀？傻㗎咩？偏偏Rebecca、Jason同Patrick呢3個喺台灣環島認識、畀台灣人問「點解唔行香港」問到口啞啞嘅「傻人」，就決定用佢地對腳，話畀我地聽：只要想行，就算無路，都可以發一個「環港夢」。就算呢14日無得番屋企、要周圍紮營訓覺、仲唔係日日有得沖涼，但呢3個八、九十後話：我們還講夢呀！

Dion同好多人一樣一出世就有濕疹，日常生活佢要經常戒口，就連陽光同水，佢都要忌住忌住。除咗有濕疹，佢仲同時係一個媽咪，而懷孕，就偏偏喺濕疹最嚴重，醫生話佢冇可能生到嘅情況，而即使囝囝好有機會都有濕疹，但Dion都選擇將囝囝生落嚟，同老公一家人一齊去面對，因為佢知道，無論皮膚痛到點樣都好，喺皮膚下佢係一個媽媽⋯⋯

喺深水埗一個商場，有好幾間視障人士按摩中心，我哋就去咗其中一間，睇下一班視障按摩師，點樣透過佢濛濛、睇唔清嘅雙眼，去睇自己呢份自食其力嘅工作。當中，有人就因為睇得同聽得比較清，搵到人生嘅另一個方向，但亦都有人，雖然睇唔到、幾近對人生冇特別嘅需求同渴望，但反而，睇得更加清現實好難去睇穿嘅人心⋯⋯

攝影用語，The Magic hour，通常係指黃昏日落時嘅某一刻，好似魔幻世界咁靚嘅天色。就好似年屆60幾到80幾嘅佢哋，退休後先至開始學習同追求年輕時嘅拍片夢想。你哋睇下，黃昏先嚟變魔術嘅佢哋，幾cute，幾可愛！

生cancer？咁大件事！？應該唔會有我哋份啩？但唔係呀，3年前，原本健健康康、讀緊大學、只係得22歲女嘅「彤姐」，就確診患上咗第二期淋巴癌！同所有人一樣，冇諗過自己唔煙唔酒冇遺傳、但咁後生就生cancer嘅彤姐，心情跌咗入谷底⋯⋯丫，唔係！應該話，彤姐心情好快就由谷底上番嚟！因為佢有嘅，係比人更大無畏、純粹到「有病咪就去醫囉」嘅樂觀心態！佢仲話，喂，唔好被D電視劇，搞到你覺得cancer好恐怖先得架！

佢哋就係「淡定父子」喇！淡定爸Eddie Sir平時好鍾意帶住淡定哥四圍去。唔講唔知，原來淡定哥係淡定爸3年前喺東涌收養番黎嘅流浪狗，日日唔知可以去邊，仲整傷埋隻眼，好彩之後遇到淡定爸，帶左佢番屋企，自此，佢地就成為左淡定爸同淡定哥，化身「動物大使」周圍去幫人！而淡定哥都搵番佢嘅「狗生」意義！

佢冇時停、佢又需要不停嘅關注⋯⋯一個媽媽，點諗到8年前，生左第一個患有自閉症加過度活躍症既囝囝，喺3年之後再生另一個，竟然患有比大仔更嚴重自閉症嘅細仔！經歷雙重打擊嘅劉太，唔單止冇選擇將兩個囝囝送走，「每日面對住兩個囝囝精神轟炸、受盡旁人冷言冷語，而且焦慮、抑鬱，瀕臨崩潰邊緣」嘅佢，反而更堅決，選擇一年365日，無時無刻，不停咁去愛同包容自己嘅親生骨肉⋯⋯