佢係黎港新，80年代開始接觸搬運行業，一做就卅年。本身專請更生人士開工嘅佢，5年前，佢嘅「加零壹」搬運公司，開始以對方負擔得起嘅相宜價錢，幫住喺唐樓、劏房户等嘅基層搬屋，市價幾千，有時佢就只收幾百！仲有，鍾意同人吹水make friend嘅佢，仲有一套「要同地球make friend」嘅理念，人哋唔要嘅傢俬，佢會先收費接收，諗辦法翻新，然後又再轉贈有需要嘅人⋯⋯

佢叫做江忞懿，Yvette，有人叫23歲嘅佢做「蛙后」，上個月正式達奧運A標，代表香港出戰里約熱內盧嘅奧運。啱啱，佢仲同歐鎧淳、鄭莉梅、施幸余，喺4乘100米混合泳接力游出位列全球15嘅成績，隨時有多一項入選！雖然，今日嘅Yvette，唔止dub低頭落水「光環都唔會掉下來」，但原來曾經鍾意游水，鍾意到自覺似魚嘅佢，亦有過好似石頭咁沉重嘅日子⋯⋯

上星期，76歲嘅果欄臨時搬運工人明叔，喺凌晨搬生果嘅時候，意外被懷疑醉駕嘅私家車司機撞死，因為事後有街坊，被影到笑住咁撿拾明叔散落一地嘅橙，而引發咗網上大量不齒「執死人橙」行為嘅後對聲音。我哋就喺凌晨時份，去咗已經有100多年歷史嘅油麻地果欄，聽下正面對領展、超市衝擊嘅果欄檔主，仲有一班有老有嫩、喺馬路邊販賣勞力搵食嘅苦力大哥，佢哋今日嘅生活同生存究竟係點嘅。

本來唔煙唔酒嘅Wendy，8年前突然確診肝硬化，醫生話得番3年命，要排期換肝。咁啱，有個外籍小朋友喺大陸意外身亡，因為10歲嘅佢簽咗器官捐贈，佢嘅爹哋媽咪仲用專機將佢帶番香港，遺愛人間。而有幸移植咗小朋友肝臟嘅Wendy，依家雖然有排斥嘅狀況，但佢話，佢而家係「兩個生命」，佢希望自己可以活得快樂同有意義，去回饋呢位小朋友同爹哋媽咪嘅大愛⋯⋯

早前網上流傳一位媽媽喺街餵母乳嘅相，引嚟全城關注母乳餵哺，支持者仲紛紛喺facebook copy & paste發帖文，話「今朝，我喺公廁入面食咗超好食嘅乜乜乜」，反問大家「咩話！你覺得我有病？點解喺廁所食？令你好反胃呀？咁，點解大家可以提議啲媽媽，喺廁所入面餵哺母乳嘅呢？」我哋就搵到兩位母乳餵哺媽媽，同大家分享一下，面對唔理解嘅身邊人，同喺香港地公眾場所或者office，要安心咁餵母乳或者泵奶，究竟有幾受歧視⋯⋯

因為低成本製作嘅本地獨立電影《十年》攞咗香港金像獎嘅最佳電影，引嚟電影投資者兼老闆林建岳，拋出咗一句「如果我話俾你聽，有一間雲吞麵店係全香港最好嘅餐廳，你會唔會唔服氣」⋯⋯我哋梗係唔服氣啦！雲吞麵喎！就好似呢間喺大埔開咗70年、一家四口親自落手做麵嘅雲吞麵舖，有人每個星期6日都去刷幾碗麵、連星爺周星馳都係佢粉絲，唔敢話係最好，不過，喺雞蛋與羔羊呢邊，起碼佢都係「最Like」嘅囉！

10歲嘅心心由細到大都好鍾意龜龜，佢最大嘅心願，就係可以親眼見到同親身咁接觸到海龜。唔好睇小呢個願望呀，因為，全靠Make A Wish願望成真基金幫佢達成呢個心願，心心當日先至好犀利咁將癌症病魔打低咋！

乜嘢係愛呀？無私嘅付出？包容？體諒？定係有車有樓，有里安納度、林嘉欣咁靚仔靚女，先至係愛呀？可能，真係要喺黑暗之中，先至可以搵到答案喎！就好似喺「黑暗中對話」認識嘅呢pair情侶－－有正常視力嘅阿初，同得番不足1成視力、即將步向完全黑暗嘅Eunice咁樣，因為其中一方睇得唔清楚，反而，令佢哋更加清楚，乜嘢先至係愛。

佢哋係樂隊Omega，由主音兼結他手Wilson、鼓手Tony同鍵琴手Terry組成……背後領軍嘅，竟然係佢哋3個嘅媽咪！？原來3個媽媽，係因為見自己嘅囝囝，分別患有學習障礙、輕度智障，同輕度弱智加自閉，但偏偏都勁有音樂天分，為咗令佢哋可以活得精彩同開心，偉大嘅媽媽就出手，幫佢哋合組咗呢隊絕對唔普通嘅super band嘞！所以話，「世上只有band媽好」呀！

佢曾經喺擂台擊倒世界級拳王，八十年代被封為全球華人最高身價嘅拳手，被公認係全世界華人最勁揪嘅！而佢嘅事跡亦都充滿傳奇，首先細個先天有缺憾、身體仲係最孱弱嘅，後嚟仲屢次喺擂台度面對不公平嘅對待，但佢有嘅，係堅毅不屈、每日豁出去用最多時間苦練嘅鬥志同精神，即使今日60歲，佢仲仍然堅持每日做幾小時嘅體能鍛鍊……