啲人成日話女追男隔層紗，但係毛毛對住男神就會紅都面晒唔知點算㗎喇。本來打定輸數要過lonely Christmas ，點知畀毛毛睇到呢個妹妹嘅勵志故事，突然覺得人生充滿希望呀！

話說呢個四歲妹妹Taysia嚟自威爾斯，參加咗英國嘅真人show節目，不過因為佢好怕醜，所以冇咩小朋友肯同佢玩。但係可愛妹不但冇放棄，主動向其中一個男仔爆炸頭Fabien示好，仲即席表現開心舞希望可以抱得美男歸。可惜，睇嚟個男仔就唔多受，仲一副陶大宇咁嘅樣表示冇眼睇，搞到妹妹個心好似穿咗個窿咁呀。

不過好似妹妹咁大膽又笑得甜嘅女仔，只要唔放棄一定會有人識欣賞㗎！

話口未完，節目入面安排咗可愛妹同另外一個男仔合作玩遊戲，不但合作得好好，仲拎埋獎㖭，呢個時候，爆炸仔終於知自己走寶，主動同返佢玩，仲話鍾意佢㖭呀，睇到佢哋含情默默咁對望，毛毛係唔會羨慕嘅！不過就有少少葡萄咁囉…… Between，男人就係咁㗎喇，冇咗先識得珍惜，好心爆炸仔你就唔好吊高嚟賣啦！

其實可愛妹打動咗嘅又點止爆炸仔呀，仲有千千萬萬嘅網民。好多網民話佢好cute，又好鍾意佢嘅Welsh Accent（威爾斯口音）喎。Well，其實毛毛都識跳開心舞，講嘢仲有少少 “West Cow” Accent ， 即係「西九口音」啦，唔知有無人可以同毛毛做吓朋友呢？

圖片及資料來源連結：每日郵報 
延伸閱讀：【毒L悲歌】大大隻字寫住童貞 仲派埋卡片 點知都係…