2016年12月07日 星期三
【神同步】你哋受埋我玩啦喵！
見你做咗咁多年人（如無意外應該係人），就問下你，知唔知做人最緊要係咩？買樓？搵錢？錯喇！係埋堆呀！中學嘅時候，女同學見個個都電負離子頭，自己咪又電埋一份囉，男同學見個個都唔攝恤衫，自己咪又hea晒出嚟囉。到出嚟做嘢，唔通大家話去pantry蛇王你仲話打埋份report先咩，實一個朋友都冇呀。原來埋堆文化唔止人類，連喵星人都一樣有㗎！
呢三隻橙色喵星人排排坐喺路邊，仲要連甫屎都一樣，一睇就知佢哋感情幾好啦！一定friend過打band啫！
突然小白喵走咗過嚟，見到佢哋三個小圈子咁自己圍威喂，都好想埋佢哋堆一齊玩呀！
小白喵似乎又醒起媽咪叫過佢唔好亂咁群埋班街童度，好影學壞，所以有少少猶疑，唔知行唔行埋去好……諗咗陣，佢都係決定跳埋上去，埋堆最實際！
「我係咪同你哋好似呢！受埋我玩啦好唔好呀喵～」
「好啦！不過你以後要坐第一個位呀下，幫我哋擋太陽呀喵！」
摩擦力極強嘅毛毛發現，相入面嘅橙色貓s疑似係之前目撃女朋友喺自己面前偷食嘅可憐事主，三位男主角飽歷情傷而同病相憐，組成「失戀者們」。而小白喵，就似係當日爽歪歪嘅奸夫……估唔到佢咁快就要加入呢個組織呀下，風水果然輪流轉！
封面圖片、資料來源連結：我和寵物的日常／微博
