由細到大我哋都聽埋好多不明文規定，男仔要玩機械人，女仔要玩煮飯仔，男仔要堅強啲，女仔就要斯文啲⋯⋯（下刪一百萬字）⋯⋯但係呢啲嘢又係咪一定啱先？點解女仔唔可以鍾意玩槍玩車仔，男仔就唔可以扮靚玩Barbie呀？

今次毛毛冇整蠱你哋㗎，呢個著住裙嘅小朋友望落似男仔，實際上都真係一個男仔嚟㗎！點解佢會著裙？咁我問返你，點解佢唔可以著裙先？女仔都可以著褲啦！

呢個5歲嘅小朋友叫Cian，佢媽咪都係咁諗，著衫本來就係應該著自己鍾意同令自己舒服嘅衫㗎啦，點解男仔就唔著得裙先？所以媽咪就畀Cian自己揀著咩衫，就算係裙仔都無所謂。
其實坊間普遍覺得男仔應該鍾意玩嘅嘢，Cian都啱㗎，好似啲超級英雄玩具同車仔咁。佢都好清楚自己係一個男仔，只係佢覺得啲裙好靚，所以想著啫，佢有時都會著返褲仔㗎。

媽媽唔止撐囝囝著裙，仲幫佢影咗啲靚相Post喺網上面?啵。原因就係，佢知有好多家長都好介意自己個仔或者個女做啲唔似自己性別嘅嘢，但係其實好多嘢本身都冇男女之分㗎，只係我哋自己將啲嘢分咗類咋嘛。

佢希望藉住呢輯相，鼓勵父母多啲尊重自己嘅仔女，好好咁接納同理解仔女本來嘅性格喜好，而唔係將父母覺得啱嗰套強加喺仔女嘅身上。

喺啲相見到Cian笑得咁開心，就知佢幾幸福啦～梗係啦，有個咁開通嘅媽咪，換轉喺香港，唔好話著裙吖，淨係鍾意某個成日叻eat糕嘅女王都畀人鬧死啦！其實好多父母都係想自己嘅仔女開心健康咁成長啫，由細細個開始就教佢做人唔好咁介意人哋嘅睇法，小朋友大個咪仲活得開心～

封面圖片及資料來源：Kell's Natural Photography