23/1《星期三港案》霞姨：放飯喇～

旁述：龍志權

唔知大家有幾耐冇返過屋企食「住家飯」呢？但原來喺香港有一班細路，因為同屋企人政見唔同，關係破裂，已經好耐冇食過屋企飯，甚至有家歸不得。
3個月前，霞姨參加咗 好鄰舍北區教會「住家飯計劃」，成為嘅義廚之一，全心全意為呢班小朋友煮飯食，煲湯飲。
霞姨話，細路想要醫肚，唔單止有生命麵包、連鎖快餐，仲有霞姨熱辣辣嘅愛心飯盒啊！

P.S 好鄰舍北區教會叫毛毛提提大家，計劃不缺義廚，但仲缺食飯嘅寶寶呀！寶寶們，唔使怕醜，即管開口！