2017年06月12日 星期一
【潮流教主】阿婆著起潮Tee爛牛上嚟都不知幾型呀！
通常嚟講，當爛牛遇上長輩，最後都只係會得兩個下場：一係乖乖地畀人補返上面啲窿，一係就成條畀人當垃圾咁抌咗佢。呢個世界上，甚少有爛牛可以逃出長輩嘅魔掌⋯⋯除咗呢條。
「望咩呀望，未見過阿婆著爛牛呀？」
唔知大家仲記唔記得，早前毛毛同大家介紹過一位一開ig就有成2萬幾人follow嘅台灣88歲婆婆林莊月里呢？冇見一排，佢個ig又多咗3萬幾人follow喇喎！而佢之所以有咁多fans，咪就係因為佢成日都會喺ig分享佢嘅至潮穿搭囉！
最近，佢呢張著住爛牛嘅相就再次令佢成為網民焦點，唔少網民都大讚佢夠潮，話終於有長輩係唔會拎條爛牛去補咁話喎～另外，仲有網民建議阿婆下次可以著埋魚網絲襪嚟襯爛牛?！
潮Tee又好，爛牛又好，阿婆通通都carry到！喂，阿婆你咁潮，幾時過兩招畀毛毛呀？
